6 طرق فعالة للبحث عن وظيفة

اصحاب العمل دلوقتى بقوا اصعب فى اختيارتهم فى الناس اللى متقدمه للوظيفة ، وساعات بيبقى في طلبات وشروط كتيره هم حاطينها للشخص اللى هيتعين ، من هنا لازم الناس اللى بتدورعلى شغل يطورا نفسهم هم كمان ، محتاج تبقى اكثر ذكاء ، علشان تفوز فى المنافسة اللى موجودة دلوقتى فى سوق العمل 
لازم تحط استراتيجيه جيده علشان تقدر تفوز بالوظيفة ، قبل ما حد تانى يخطفها منك ، النصائح اللى جاية دى تقدر تساعدك على انك تبقى اسرع من غيرك فى الحصول على الوظيفة : 
1- وسع دائرة الاتصال :
دلوقتى العالم بقى اصغر بفضل وسائل الاتصال والتكنولوجيا والانترنت ، علشان كده خد من وقتك دقيقتين بس ، وسيب الفيس بوك شويه ، واشترك فى مواقع وشركات التوظيف واعمل حساب عليهم وكمل كل البيانات وخلى البروفايل بتاعك يوصل لاعلى نسبة إكتمال
خد بالك ان كل الشركات دلوقتى بقت تعتمد بنسبة كبيرة جداااااااااااا على مواقع التوظيف الالكترونى اكتر من الوسائل التانية زى الجرائد
2- ماتضيعش وقتك :
لو انت دلوقتى من غير شغل ، كل دقيقة بتمر عليك بتبقى غالية ، علشان كده حسن من طرق بحثك عن الشغل ، وابعد عن وسائل البحث اللى بتضيع وقتك بدون نتيجة حقيقية ، وهنبقى نحط مقال ازاى نتجنب الطرق دى
3- تعرف موقع LinkedIN ؟ :
لو تعرفه هيبقى سهلت عليا شرح كتييير جدا ، لو مش تعرفه بقى أنصحك تدخل على الموقع واكتشف العالم ده بنفسك :
www.linkedin.com

اما اللى يعرفه ، فالنصيحه هنا ان انت تعمل اشتراك ومتابعة على كل الشركات الكبيرة وبالاضافة برضه تبعت دعوات قبول الى العاملين بمجال التوظيف ، علشان اول ما تكون هناك وظيفة فاضية تكون انت ضمن الشبكة بتاعتهم
4- خلى السى فى بتاعك سليم :
ايوة لازم السى فى بتاعك يكون خالى من الاخطاء اللغوية لو انت كاتب بالانجليش ، وبرضه يكون سليم من خلال التنسيق والاعداد والعرض ، واسهل وسيله لكده ، ان انت تخلى حد من المختصين فى مجال الموارد البشرية يبص على السى فى بتاعك ، ويقولك رايه فيه ، والحاجات اللى ممكن تظبطها فيه
5- اتعب شوية فى البحث والمعلومات :
مفيش حد بيوصل للى عايزه بسهوله ، علشان كده لازم تتعب شوية فى البحث عن اهم الوظائف ، او المهارات اللى دايما اصحاب العمل بيدوروا عليها ، كمان الكورسات والدورات والشهادات المطلوبة فى السوق ، وماتقولش انا معايا انجليزى وكمبيوتر وكده انا تمام ومش محتاج حاجة ، احب اقولك ان دول بقوا حاجات اساسية مش اضافيه زى القراءة والكتابه كده
6- تطور من علاقاتك :
استخدام العلاقات والتعارف بالطرق السليمة ، بيسرع من فرص حصولك على وظيفه ، يعنى لازم تزود من علاقاتك مع العاملين بمجال التوظيف ، والعاملين بشبكات التوظيف والموارد البشرية ، يعنى مثلا لما حد يقدمك لحد شغال فى شركات توظيف انت كده اتقدمت خطوة
وبالتوفيق ....